Karl Th. Birgisson, ritstjóri Herðubreiðar, segir lögmanninn Jón Steinar Gunnlaugsson ekki vera samkvæman sjálfum sér, í pistli á Herðubreid.is í gær. Jóni Steinari var stefnt af Hæstaréttardómaranum Benedikti Bogasyni á dögunum, fyrir meiðyrði í nýjustu bók Jóns Steinars, en þar segir Jón Steinar að Hæstiréttur hafi framið „dómsmorð“ á Baldri Guðlaugssyni sem var dæmdur fyrir innherjasvik 2012.

Karl Th. Segir:

„Gott og vel. Ég tek ekki afstöðu til efnisatriða þessa tiltekna máls, en leiði hugann að 130. grein almennra hegningarlaga:

„Ef handhafi dómsvalds eða annars opinbers úrskurðarvalds um lögskipti gerist sekur um ranglæti við úrlausn máls eða meðferð þess í því skyni, að niðurstaðan verði ranglát, þá skal hann sæta fangelsi allt að 6 árum.

Hafi verknaðurinn haft eða verið ætlað að hafa í för með sér velferðarmissi fyrir nokkurn mann, þá skal refsingin vera fangelsi ekki skemur en 2 ár og allt að 16 árum.“

Semsagt: Jón Steinar virðist ótvírætt og alveg vífilengjulaust saka dómarana um refsivert athæfi, sem varðar meiraðsegja margra ára fangelsi.“

Karl Th. Ber þetta síðan saman við dómsmál Egils „Gillzeneggers“ Einarssonar, sem Jón Steinar fjallaði um á Rás 2 á dögunum.

„Þar sagði hann skýrt og skorinort að sínum hætti: Það má ekki og er ólöglegt að saka mann opinberlega um refsivert athæfi sem ekki hefur sannazt á hann eða hann verið fundinn sekur um. Basta. Og rétt hjá honum.

Óhjákvæmlega vaknar nú að minnsta kosti ein spurning:

Í ljósi þessara nýlegu ummæla (og margra fleiri), tekur því nokkuð fyrir Jón Steinar að grípa til varna í meiðyrðamálinu? Ég þykist vita að hann muni gera það, en málsvörnin hlýtur þá að byggjast á því að önnur lög gildi um hann sjálfan en þann sem sakaði Egil Einarsson um refsivert athæfi.

Að öðrum kosti er ekki nokkur samkvæmni í því sem hann segir.

Og það þykjumst við vita, að sé eitt af því síðasta sem hann vill gerast sekur um.“

Jón Steinar hefur nú svarað Karli Th. í pistli sem lesa má hér.