Á opnum fundi sem Reykjanesbær hélt nýlega vegna fjárveitinga ríkisins til verkefna á Suðurnesjum og samanburð Dr. Hugins Freys Þorsteinssonar við aðra landshluta kom fram að bæði sveitastjórnarfólk á Suðurnesjum og þingmenn kjördæmisins hafi vitað af vandanum, en ekki að munurinn væri eins mikil og úttekt Hugins gefur til kynna. Ekki virðist hafa verið tekið tillit til þeirrar miklu fólksfjölgunar sem verið hefur að undanförnu, langt umfram landsmeðaltal og mikillar fjölgunar ferðamanna sem reyna á innviðina í kringum flugstöðina.
Sveitastjórnarfólk á Suðurnesjum hefur lengi vitað að svæðið hefur fengið mun minna fjármagn frá ríkinu en önnur svæði á landinu og komu niðurstöður opins fundar í gær, þar sem niðurstöður voru sýndar svart á hvít, þeim því ekki á óvart. Það hefur margoft sent frá sér sameiginlegar ályktanir til ráðamann þjóðarinnar um vandann sem virðast ekki hafa hlotið hljómgrunn. Þingmenn Suðurkjördæmis sem kváðu sér hljóðs á fundinum í gær sögðust kannast við vandann. Sumir kváðust ekki hafa áttað sig á að munurinn væri eins mikill og rannsókn Dr. Hugins Freys Þorsteinssonar hjá ráðgjafafyrirtækinu Aton gefa til kynna. Einn þingmanna líkti ríkinu við flugmóðurskip þegar kemur að breytingum.
Íbúafjölgun í Reykjanesbæ hefur verið fordæmalaus á undanförnum árum, allt upp í tæp 8% á ári, sem er langt umfram landsmeðaltal. Sömu sögu er að segja um fjölgun ferðamanna sem bæði kallar á aukið álag á innviðina í nágrenni flugstöðvar en ekki síður á aukinn mannafla við mikinn uppgang í flugi og flugtengdri starfsemi. Í inngangserindi Kjartan Más Kjartanssonar bæjarstjóra Reykjanesbæjar kom fram að á Norðurlöndum séu þau svæði þar sem íbúum fjölgar um meira en 1,5% á ári skilgreind sem vaxtarsvæði og ríkið komi að og aðstoði. Mikilli fjölgun fylgi mikið álag á innviði, byggja þurfi grunn- og leikskóla, leggja götur og fleira.
Svo virðist sem gleymst hafi að taka mið af mikilli fólksfjölgun við útdeilingu fjármuna til verkefna ríkisins á svæðinu. Upplýsinga fyrir úttektina var einnig aflað úr frumvarpi til fjárlaga ársins 2018, auk upplýsinga frá stofnunum sem eru með starfsemi á svæðinu og eru háðar fjármögnun frá ríkinu. Kjartan Már sagðist vona að vandamálið hafi náð eyrum þeirra þingmanna og frambjóðenda sem mættu á fundinn svo hægt sé að hefjast samtal um leiðir til úrbóta.
Reykjanesbær hefur verið í fjárhagslegri endurskipulagningu á undanförnum árum og hefur þurft að draga saman seglin. Góður árangur hefur þó náðst með þrotlausri vinnu, en gæta verður áframhaldandi aðhalds á næstu árum.
Bæjarstjórn Reykjanesbær lét gera úttektina enda höfðu bæjarfulltrúar lengi grunað að pottur væri brotinn í fjárframlagi ríkisins til verkefna á Suðurnesjum. Mikill fjöldi fólks var á fundinum og margir tóku til máls.
