Vigdís Ósk Häsler Sveinsdóttir lögmaður, hefur verið ráðin sem verkefnastjóri fyrir Hringborð hafs og eldis (IAOF- Icelandic Aquaculture and Ocean Forum). Vigdís mun sinna samkiptum við innlenda og erlenda samstarfsaðila og vinna að þróun nýrra verkefna sem tengjast nýsköpun, sjálfbærni og verðmætasköpun í lagareldi og annarri haftengdri starfsemi. Vigdís er með BA-próf og meistarapróf í lögfræði frá Háskólanum á Akureyri. Árið 2009 hlaut hún málflutningsréttindi. Árið 2013 lauk hún LL.M.-prófi frá University of Sussex í Bretlandi í alþjóðalögum þar sem hún útskrifaðist með láði. Vigdís hefur setið í stjórnum félagasamtaka, fyrirtækja og í kjörstjórn fyrir kosningar til Alþingis, sveitarstjórna og forseta Íslands.
Vigdís starfar jafnframt sem lögmaður hjá Reykvískum lögmönnum. Hún var áður framkvæmdastjóri Bændasamtakanna og starfaði á Alþingi fyrir þingflokk Sjálfstæðisflokksins, þar sem hún kom að undirbúningi að gerð þingmála fyrir þingmenn. Árið 2017 var Vigdís aðstoðarmaður Jóns Gunnarssonar, samgöngu- og sveitarstjórnarráðherra. Hún starfaði einnig sem lögmaður hjá Sambandi íslenskra sveitarfélaga. Þá starfaði Vigdís í sjö ár sem lögmaður hjá Lögmönnum Höfðabakka, nú Magna lögmönnum.
„Við erum virkilega ánægð með að fá Vigdísi til liðs við okkur og þekking hennar á atvinnugeiranum er mikilvæg. Vigdís hefur fjölbreytta starfsreynslu að baki sem mun nýtast vel uppbyggingu samtakanna og lagareldis á Íslandi. Vigdís stýrði meðal annars þróunarverkefni í fiskeldi í Fjallabyggð og vann þá náið með samtökunum,“ segir Kjartan Ólafsson, formaður samtakanna.
„Það er margt framundan hjá IAOF enda greinin í örum vexti. Undirbúningur er hafin fyrir fjórðu fjárfestaráðstefnunnar sem samtökin halda í samstarfi við Arion Banka. Það voru gleðitíðindi á liðnu vori þegar tilkynnt var um að fjárfestar hafa varið allt að 650 milljónum evra í verkefni tengd lagareldi hér á landi. Það er því ljóst að markaðurinn hefur mikla trú á þeim verkefnum sem hafin eru hér á landi og greinin er komin til að vera og og því fylgja mikil tækifæri fyrir íslenskt samfélag“, segir Vigdís Ósk Häsler Sveinsdóttir.
Samtökin Hringborð hafs og eldis (IAOF) voru stofnuð árið 2023 af íslenskum fiskeldisfyrirtækjum og er ætlað fyrst og fremst að styðja við vöxt atvinnugreinarinnar á Íslandi. Samtökin eru jafnframt vettvangur alþjóðlegs samstarfs og miðlunar þekkingar um fiskeldi í sjó og á landi, áskoranir tengdar loftlagsbreytingum og nýtingu fiskeldisins, auk annarra þátta sem gera atvinnugreinina að undirstöðuatvinnugrein íslensks efnahagslífs til framtíðar. Samtökin styðja við atvinnuuppbyggingu í greininni og velflest laxeldisfyrirtækin á Íslandi eru aðilar að samtökunum.
