Sóley Tómasdóttir, fyrrverandi borgarfulltrúi VG, vill stofna nýjan Kvennalista og gagnrýnir hún sinn gamla flokk harðlega á Facebook-síðu sinni. Sóley skrifaði stöðufærslu aðfaranótt sunnudags þegar niðurstaða kosninga lá að mestu fyrir og var ljóst að konum fækkaði talsvert á þingi.
„Ok. Kvennalisti er málið. Strax í vor,“ skrifaði Sóley.
„Enn einn flokk vinstra megin við miðju“
Fjöldi kvenna tóku vel í þessa uppástungu en sumar voru þó á báðum áttum. Svala Jónsdóttir var ein þeirra.
„Af því að við þurfum endilega enn einn flokk vinstra megin við miðju til að tryggja Sjálfstæðisflokknum, Framsóknarflokknum og útibúum ævarandi völ,“ skrifaði Svala. Því svaraði Sóley: „Nei, við þurfum að setja kvenfrelsi á dagskrá sem alvöru viðfangsefni. Það hafa vinstriflokkarnir ekki gert.“
Svala spurði þá hvort VG hafi ekki gert það meðan hún var í forystu flokksins. „Nei, ekki sem hreyfing. Ég gerði það, og það eru konur innan VG sem gera það ennþá, en hreyfingin sem slík er ekki femínísk. Því miður,“ svaraði Sóley.
„Það var meira framboð en eftirspurn eftir flokkum“
Sigríður Guðmarsdóttir prestur sagðist mjög ósammala Sóley:
Ég er ákaflega ósammála þessu. Þau (eða öllu heldur þeir) sem þurfa að hysja upp um sig eru Sjálfstæðisflokkur, Miðflokkur og Flokkur fólksins. Þeirra kjósendur munu ekki flykkja sér um enn eitt klofningsframboðið á vinstri vængnum.
Sóley svaraði þá að málið snerist ekki bara um að koma konum að heldur jafnframt að tala fyrir kerfisbreytingum. „Það er fullt af góðu fólki sem talar fyrir kerfisbreytingum i íslenskri pólitík og margt af því eru líka góðir femínistar. Það var meira framboð en eftirspurn eftir flokkum í þessum kosningum. Kerfisbreytingaflokkar eins og Píratar og Viðreisn misstu mikinn þingmannsstyrk. Þriðji kerfisbreytingarflokkurinn Björt Framtíð þurrkaðist út og sá fjórði, Dögun, náði ekki fylgi. Það sem þarf, að mínu viti, er að fólk geti unnið saman um hugsjónirnar, ekki að búa til enn einn flokkinn,“ var svar Sigríðar.
„Ég reyndi í 10 ár“
Sóley sagðist hafa reynt í tíu ár að auka femínískar áherslur í VG. „Ég reyndi í 10 ár. Femínismi er nákvæmlega jafn jaðarsettur núna og þá innan VG. Það er ekki hægt að vinna að femínisma í blönduðum flokkum,“ sagði Sóley. Sigríður sagði þá á móti að þetta væru stór orð og að Sóley hafi orðið mikið ágengt á þessum tíu árum.
Sóley telur hins vegar að henni hefði orðið meira ágengt utan VG:
„Ég sagði ekki að mér hefði ekki orðið ágengt. Ég gerði helling og það er fullt af konum í öllum flokkum að gera helling. En flokkarnir eru ekki femínískir í grunninn heldur fela einstaklingum að dekka málaflokkinn svo hin geti talað um alvörumálin. Ég er búin með þá tilraun fyrir mitt leyti. Vá hvað ég hefði getað gert miklu meira í gegnum öflugan kvennalista í stað þess að vera stöðugt að ströggla við eigin hreyfingu sem vildi að ég breikkaði mig og brosti meira og hætti að vera svona einsmáls.“
