Miðflokkurinn ætlar að setja fram eina samhæfa hugsun fyrir landið allt, það er mikilvægt fyrir framtíð Íslands. Við ætlum að snúa vörn í sókn, við ætlum að samstilla ólíkar aðgerðir svo eitt styðji við annað.
Allir vinna saman
Við ætlum að kalla til sveitarfélög, landshlutasamtök, atvinnurekendur, ráðgjafafyrirtæki, fjármálafyrirtæki og menntastofnanir. Kalla alla aðila sem tilbúnir verða til þess að fara í þessa heildaráætlun þannig að allir vinni saman, í því felst heildarnálgun og sterk liðsheild.
Við ætlum að halda áfram áætlun við opnun fleiri fluggátta og tryggja uppbyggingu innviða í innanlandsflugi þar sem ISAVIA gegnir lykilhlutverki. Við ætlum að beina fjárfestingum að efnahagslega kaldari svæðum og létta álagi af þenslusvæðum.
Tryggja heilbrigðisþjónustu
Við ætlum menntastofnunum utan höfuðborgarsvæðisins að verða leiðandi í að nýta tækni á sviði menntamála. Rannsóknir- og þróunarsjóðir verði að hluta merktir sókn í ákveðnum landshlutum. Opinberum störfum utan höfuðborgarsvæðisins fjölgi ásamt því að starfsöryggi undirstöðuatvinnugreina verði tryggt og heildarframlag þeirra metið að verðleikum.
Við ætlum að tryggja heilbrigðisþjónustu um allt land, ríkið uppfylli tiltekið þjónustustig og sjúkrahúsið á Akureyri er annað hátæknisjúkrahús landsins, það á að virka sem slíkt.
Með þetta að leiðarljósi er hægt að hugsa um landið sem eina heild – eitt samfélag – Ísland allt.
Anna Kolbrún Árnadóttir, höfundur skipar 2. sæti á lista Miðflokksins í Norðausturkjördæmi.
