„Það er verk að vinna í þessu samfélagi, það sem ég hef sérstakar áhyggjur af er staða ungs fólks. Við sjáum að unga kynslóðin í dag er sú fyrsta í sögu Íslands sem hefur verri tækifæri en kynslóðin fyrir ofan. Húsnæðisverð á höfuðborgarsvæðinu hefur hækkað um 90% á sjö árum, við erum búin að ganga allt of langt í skerðingu, fjórða hver fjölskylda er dottin úr barnabótakerfinu, helmingurinn er dottin úr vaxtabótakerfinu. Þetta eru tól sem stjórnvöld hafa til að mæta ungu fólki, fjölskyldufólki, og við höfum ekki verið að nýta þau,“

sagði Ágúst Ólafur Ágústsson frambjóðandi Samfylkingarinnar í Reykjavík í þættinum Bítið á Bylgjunni í morgun. Ræddi hann þar um áhersluatriði Samfylkingarinnar ásamt Þorsteini Sæmundssyni frambjóðanda Miðflokksins sem ræddi um áhersluatriði síns flokks. Þorsteinn sagði helsta verkefni síns flokks væri að lækka vexti. Ágúst Ólafur ræddi um áætlun Samfylkingarinnar að berjast gegn ofbeldi í samfélaginu, hafði hann einnig miklar áhyggjur af stöðu ungs fólks og fjölskyldufólks, sem og eldri borgara, sagði hann að stjórnvöld hefðu gengið allt of langt í að skerðingum og með því væri verið að refsa fólki fyrir að vinna. Samfylkingin hefur verið gagnrýnd að undanförnu fyrir kosningaloforð sem krefjast mikilla fjárútláta, þá sérstaklega í heilbrigðis- og menntakerfinu, sagði Ágúst Ólafur að skattar yrðu ekki hækkaðir á almenning, lágtekju- og millitekjufólk, heldur aðeins hátekjufólk:

Við þurfum hærra auðlindagjald í fyrsta lagi, minna en 1% af ríkistekjunum koma í gengum auðlindagjöldin. Auðvitað viljum við ekki þrengja að sjávarútveginum, sjávarútvegurinn er sjálfbær og vel rekin grein, en þetta er líka auðlindagjald gagnvart orkufyrirtækjunum. Svo þurfum við að finna leiðir til að fá meiri tekjur frá erlendu túristunum.

Þorsteinn: Höfum þegar gert hið ómögulega tvisvar eða þrisvar

Þorsteinn segir að fyrir utan uppstokkun á fjármálakerfinu og að færa nýjan Landspítala frá Hringbraut þá vilji Miðflokkurinn nota milljarðana innan úr bankakerfinu til þess að greiða niður skuldir ríkisins en einnig að ráðast í uppbyggingu innviða. Hann lagði einnig mikla áherslu á að lækka tryggingagjald, mest hjá litlum fyrirtækjum:

Fólk mun finna fyrir því þegar Miðflokkurinn kemst að, að hér verða ekki allir skattaðir í drep eins og Samfylking og Vinstri græn hafa boðað. Það sem líka finna fyrir því að hér yrðu vextir lækkaðir hressilega. Lítil og meðalstór fyrirtæki myndu blómstra. Aldraðir og öryrkjar munu hafa það betra. Og fólk mun finna fyrir því að það á greiða leið inn í verknám og iðnnám sem mun leiða til minna brottfalls.

Aðspurður hvort það mætti líkja Miðflokknum við afgreiðslumann í verslun sem reyndi að eignast vini með því að gefa þeim nammi úr hillunum sagði Þorsteinn:

Nei, en þetta er mjög skemmtileg samlíking. Eins og vant er þegar við komum fram með djarfar hugmyndir þá koma úrtölumenn og segja að þetta og hitt sé ekki hægt, við erum þegar búin að gera hið ómögulega tvisvar eða þrisvar, þessi hópur sem stendur að Miðflokknum.