„Ég fékk nett hjartaflökt eftir síðasta póst hér á fésinu og þurfti að fara á sjúkrahús í tékk út af því. Og einhvern ólundar sting í magann sem ég hef ekki fundið síðan 2007 minnir mig. Allt í fína með það. Við erum með ókeypis heilbrigðisþjónustu svo ég hef ekki miklar áhyggjur af því.“

Þannig hefst nokkuð meinhæðinn og beittur pistill eftir Magnús Jónsson leikara. Magnús greinir frá því að við innritun hafi hann greitt 3000 krónur. Þá þurfti að taka röntgen mynd og kostaði hún 25 þúsund krónur. Í pistlinum tekur Magnús fyrir breytingar á heilbrigðiskerfinu sem hafa verið nokkuð umdeildar. Breytingarnar eiga að vera þeim í hag sem eru langveikir eða þurfa að fara oft til læknis. Stakar heimsóknir geta reynst nokkuð dýrar.

„ … og úr því að ég var komin þangað vildu þau líka taka myndir af maganum sem kostuðu mig 18 þúsund í viðbót en kva, við erum með ókeypis heilbrigðisþjónustu svo ég var frekar áhyggjulaus yfir þessum tölum. Ég er líka listamaður og talnablindur eftir því og treysti því sem er alltaf verið að segja: „Við erum með ókeypis heilbrigðisþjónustu“.

Loks kom niðurstaðan: „Það er allt í lagi með mig. Jeiiii!!!“ segir Magnús og bætir við að kannski hafi verkurinn verið vegna kvíða og stress.

„Svo skrifaði hún upp á lyfseðil handa mér. Jú, ég þarf að taka lyf í nokkra daga við þessu öllu saman sem kosta mig 15.000 krónur en ég er með lyfjakort og fæ þetta niðurgreitt þegar ég er búinn að borga 70 þúsund krónur fyrir lyf yfir árið,“ segir Magnús sem þá var búinn að greiða 61 þúsund krónur. Magnús segir að lokum:

„Hlakka til að fá þetta allt endurgreitt. Skildi eftir bankanúmerið mitt upp á greiðsluna til baka og smellti svo einum broskalli á blaðið.“