Unnur Brá Konráðsdóttir þingmaður Sjálfstæðisflokks í Suðurkjördæmi var kjörin forseti Alþingis á þingfundi sem hófst kl. 13:30. Unnur Brá var kjörin með 54 atkvæðum, en 5 greiddu ekki atkvæði.
Steingrímur J. Sigfússon, sem gengdi embætti forseta Alþingis í desember, var kjörinn fyrsti varaforseti þingsins. Unnur Brá sagði við kjörið að það væri hennar trú að hægt sé að vinna vel saman á Alþingi, þvert á flokka, ef vilji sé til.
Þakkaði hún Alþingismönnum traustið og sagði einkar ánægjulegt að taka við embætti forseta Alþingis við þau tímamót að konur eru nú um helmingur þingheims, eða 48%, sem er hæsta hlutfall kvenna á þingi til þessa. Lagði Unnur Brá áherslu á náið og gott samstarf við formenn þingflokka, formenn stjórnmálaflokka og alþingismenn. Vísaði hún í reynslu af þingstörfum í desember og sagði þingmenn mega vera stolta af þeim vinnubrögðum og þeirri góðu samvinnu sem Alþingi sýndi. Þakkaði hún fráfarandi forseta, Steingrími J. Sigfússyni, og forsætisnefnd góð störf og ítrekaði vilja til góðs samstarfs við þingmenn alla, hvar í flokki sem þeir standa.
Í embætti varaforseta Alþingis voru einnig kjörin Jón Þór Ólafsson þingmaður Pírata, Jóna Sólveig Elínardóttir þingmaður Viðreisnar, Þórunn Egilsdóttir þingmaður Framsóknarflokksins, Nichole Leigh Mosty þingmaður Bjartrar framtíðar og Teitur Björn Einarsson þingmaður Sjálfstæðisflokksins.
Þingfundi hefur verið nú verið frestað fram á kvöld þegar Bjarni Benediktsson flytur sína fyrstu stefnuræðu sem forsætisráðherra. Dagskráin hefst kl. 19:30. Umræðurnar skiptast í þrjár umferðir. Forsætisráðherra hefur 18 mínútur til framsögu en aðrir þingflokkar en þingflokkur forsætisráðherra hafa 10 mínútur í fyrstu umferð, í annarri og þriðju umferð hafa þingflokkarnir 5 mínútur hver.
Ari Brynjólfsson – ari@pressan.is
