Halldór Halldórsson oddviti borgarstjórnarflokks Sjálfstæðisflokksins segir kosningaloforð Samfylkingarinnar um 3 þúsund leiguíbúðir verði ekki uppfyllt, Guðfinna J. Guðmundsdóttir borgarfulltrúi Framsóknar og flugvallarvina tekur í sama streng og segir Dag B. Eggertsson borgarstjóra halda að fólk geti búið í áætlunum og stefnum.

Í grein sem birt var hér á Eyjunni segir Halldór að ekki sé vanþörf á umræðu um húsnæðismál enda sé mikill húsnæðisskortur í Reykjavík:

Í umræðunni um félagslegt leiguhúsnæði kom fram að á biðlista eftir almennum félagslegum leiguíbúðum eru 893 manns og hefur fjölgað um 150 á einu ári. Þetta er staðan þrátt fyrir að kosningaloforð Samfylkingarinnar í kosningunum 2014 hafi verið 2.500 til 3.000 leiguíbúðir á kjörtímabilinu 2014-2018. Þegar það er skoðað kemur í ljós að það hefur fjölgað um 138 almennar félagslegar leiguíbúðir frá 2010. Miðað við 3.000 íbúðir á kjörtímabilinu vantar þá ennþá 2.862 íbúðir upp í það kosningaloforð,

segir Halldór. Í kosningabaráttunni 2014 hafi Sjálfstæðismenn varað við þessu loforði en það þurfi ávallt að standa undir þeirri þjónustu sem borginni ber skylda til, það sé að útvega þeim 893 sem séu á biðlistanum húsnæði.

Ástandið aldrei verið verra

Í grein sem Guðfinnu á Eyjunni vitnar hún í húsnæðisstefnu borgarinnar frá árinu 2011, en þar kemur fram að það sé stefna borgarinnar að allir borgarar hafi öruggt húsnæði á viðráðanlegu verði. Guðfinna segir að á þeim fimm árum sem liðin séu hafi ástandið aldrei verið verra:

Dagur B. Eggertsson borgarstjóri hefur verið duglegur að þylja upp hvað fasteignafélögin eru að gera eða hvað þau ætla að fara gera á lóðum sem eru búnar að vera í höndum þessara félaga í mörg ár. Hann er líka duglegur að yfirfæra getuleysi þessa meirihluta í húsnæðismálum yfir á ríkið. Hann hefur hins vegar ekki verið jafn duglegur við að úthluta lóðum eða framfylgja stefnum og áætlunum sem hann hefur sett. Borgarstjóri virðist nefnilega halda að fólk geti búið í áætlunum eða stefnum og það sé ekki hlutverk borgarinnar að úthluta lóðum.

Ari Brynjólfsson – ari@pressan.is