Björn Bjarnason þáttastjórnandi og fyrrverandi ráðherra Sjálfstæðisflokksins skýtur föstum skotum á Gunnar Smára Egilsson ritstjóra Fréttatímans í vefdagbók sinni í dag.  Gunnar Smári hefur blásið til söfnunar fyrir Fréttatímann, svipað og breska dagblaðið Guardian gerði árið 2014, til að geta haldið úti útgáfu blaðsins en Björn bendir á að Gunnar Smári er skráður fyrir 46% hlut í blaðinu. Vitnar Björn í skrif Páls Vilhjálmssonar um Sósíalistaflokk Gunnars Smára á Fésbók, sem var áður flokkur um að gera Ísland að fylki í Noregi:

Gunnar Smári velur sér einatt málstað á síðasta snúningi. Kortéri áður en Ólafur F. Magnússon missti embætti borgarstjóra nokkrum vikum fyrir hrun var Smárinn orðinn aðstoðarmaður hans. Örugga leiðin til að finna andstreymi umræðunnar er að kíkja á hvaða dyntir eru upp á pallborði Gunnars Smára. Nú stendur gamaldags fríblaðaútgáfa höllum fæti og auðvitað er Gunnar Smári þar í stafni,

segir Páll. Björn segir meginstefið í Fréttatímanum vera greinar eftir Inga Frey Vilhjálmsson um afskriftir eftir hrun:

„Ingi F. segir ekki alla söguna heldur beinir spjóti sínu einkum að Bjarna Benediktssyni forsætisráðherra og fjölskyldu hans. Leitað er að nýjum „vinklum“ til að endurtaka sömu söguna hvað eftir annað,“

segir Björn:

Nú þegar Gunnar Smári hefur snúið sér með söfnunarbauk til almennings má vænta þess að Ingi F. geri lesendum Fréttatímans grein fyrir fjármálaumsvifum stofnanda félagsins Frjáls fjölmiðlun, útgefanda og ritstjóra Fréttatímans.

Væri Ingi F. samkvæmur sjálfum ætti hann að birta almenningi úttekt á fjármálaumsvifum Gunnars Smára svo að hann geti tekið upplýsta ákvörðun um að leggja honum til fjármuni.