Hvað sem þingmenn úr stjórnarliðinu segja þá er fullkominn ósamhljómur milli flokkanna varðandi skuldamálin.

Ragnheiður Ríkharðsdóttir steig fram um helgina og sagði að ríkisstjórnin væri „liðsheild“, það er líking úr íþróttunum. Eygló Harðardóttir líkti þessu við hjónaband.

En þegar kemur að málefninu ríkir kakófónía – það er hver að syngja með sínu nefi. Ekki bætir úr þegar koma ruglandi skilaboð eins og þeir sem hafi fengið einhverjar leiðréttingar, fái ekki aftur. Það er svo að nokkru leyti dregið til baka, en óvissan verður bara ennþá meiri.

Það er svosem spurning hvort sálfræðingurinn Jóhann Ingi Gunnarsson hafi náð að þétta raðirnar, hann mun hafa stjórnað hópefli með stjórnarliðum um helgina. Jóhann er fyrrverandi landsliðsþjálfari í handbolta og sérfræðingur í að búa til liðsanda.

En svo koma fréttir eins og þessi, á forsíðu Morgunblaðsins í morgun. Tekjuháir myndu fá mest af skuldafskriftum vegna íbúðalána. Það þarf ekki að segja manni að þessi uppsláttur sé tilviljun.