Landsdómurinn er áhugaverður fyrir ýmsar sakir – til dæmis að hann gerir ekki út um neitt.

Þeir sem styðja Geir og þeir sem eru á móti honum túlka dóminn á mismunandi hátt. Þeir rífast eins og hundar og kettir.

Allir eru í raun óánægðir.

Geir var mjög reiður eftir dómsuppkvaðninguna – það kom ekkert sérlega vel út. En málið er kannski það að það spyrst til útlanda að forsætisráðherrann fyrrverandi hafi verið dæmdur – og þannig fer það líka í sögubækurnar.

Jafnvel þótt aðeins hafi verið dæmt fyrir eitt ákæruatriði og Geir sé ekki gerð nein refsing.

Það verður hins vegar forvitnilegt ef Geir fer með málið fyrir mannréttindadómstól Evrópu. Baldur Guðlaugsson hefur líka sagst ætla að fara þá leið – og, ef maður skilur rétt, hafa lögmenn ýmissa manna sem eru ákærðir fyrir brot á tíma útrásarinnar og hrunsins, líka veifað Mannréttindadómstólnum.

Þannig að þar gæti myndast ös frá Íslandi.

En eftir stendur sem áður að enginn telur sig bera vott af ábyrgð á því sem gerðist á Íslandi árin fyrir 2008.