Manchester United hyggst reyna að fá enska landsliðsmanninn Conor Gallagher til liðs við sig í janúar.

Samkvæmt enskum miðlum stefnir United að því að ganga frá kaupum á 25 ára gömlum miðjumanni Atlético Madrid þegar félagaskiptaglugginn opnar.

Gallagher gekk til liðs við spænska stórliðið á síðasta ári og hefur verið fastur liðsmaður í miðju Diego Simeone, þar sem vinnusemi hans, orka og baráttugleði hafa vakið athygli.

Manchester United er á höttunum eftir að styrkja miðsvæðið eftir óstöðugt gengi á tímabilinu og telja forráðamenn félagsins Gallagher henta vel þeirri leikstefnu sem Ruben Amorim vill innleiða. Enski landsliðsmaðurinn þekkir ensku úrvalsdeildina vel eftir að hafa leikið áður með Chelsea, Crystal Palace og West Brom.

Ekki er ljóst hvort Atlético Madrid sé tilbúið að selja Gallagher í janúar, en ljóst er að United mun kanna möguleika á að fá hann til Old Trafford ef tækifæri gefst.