Gary Neville telur að Manchester United hafi náð að vinna stuðningsmenn sína aftur á sitt band með frammistöðu sinni í fremur kaótísku 4-4 jafntefli gegn Bournemouth á Old Trafford. Kom það eftir tvö töp í röð á heimavelli.

Gegn Bournemouth var hins vear boðið upp á sannkallaðan markaleik, þar sem Amad Diallo, Casemiro, Bruno Fernandes og Matheus Cunha skoruðu fyrir heimamenn. Þrátt fyrir að jafnteflið hafi komið í veg fyrir að United færi upp í efstu fimm sætin í deildinni var Neville afar jákvæður í garð liðsins, sérstaklega vegna viðbragða stuðningsmanna.

„Það var ekkert um baul eftir þennan leik. Eftir leikina gegn Everton og West Hma voru stuðningsmenn óánægðir. En nú sáum við fólk standa eftir leik og klappa fyrir liðinu,“ segir Neville.

Neville hrósaði einnig Ruben Amorim fyrir að leggja áherslu á sóknarsinnaðan og skemmtilegan fótbolta. „Þetta var algjör ringulreið í seinni hálfleik, en góð ringulreið. Fólk kemur á Old Trafford til að fá skemmtun. Jú, þú vilt vinna titla, en stíllinn og frammistaðan skipta gríðarlega miklu hér.“