Utanríkisráðherra hefur loks viðurkennt það sem mönnum hefur þótt blasa við, að viðræðum við Evrópusambandið verði ekki lokið fyrir þingkosningar 2013.

Draumur helsta ESB flokksins, Samfylkingarinnar, hafði verið að kjósa um málið fyrir þingkosningarnar eða á svipuðum tíma og þær fara fram. Það hefði getað verið gott fyrir flokkinn og sérstöðu hans – en raunsæismenn gera sér grein fyrir að næsta vonlaust er að fá þjóðina til að fallast á aðild eins og ástandið er í Evrópu.

Það er vel hugsanlegt að kosningarnar bindi enda á málið. ESB verður örugglega eitt af stærstu kosningamálunum, það gæti vel orðið raunin að niðurstaða kosninganna yrðu einfaldlega viðræðuslit.

Að flokkar sem ekki vilja halda áfram í ferlinu – eða fresta því – öðlist meirihluta á Alþingi.

Mótrök gætu verið sú að málið verði komið svo langt að of seint sé að hætta – en það er spurning hvort þau virki á hina öflugu ESB andstöðu sem er innan margra flokka.