Der Spiegel skrifar um Joachim Gauck, nýjan forseta Þýskalands, sem blaðið segir að sé bestur þegar hann talar um frelsi, lýðræði og mannréttindi. Stór mál. Hann þykir tilfinningaríkur maður, og hikar ekki við að nota orð eins og ást.

Hann er óhefðbundinn maður sem gæti verið illa settur innan um lífverði og skothelt gler. Gauck var upprunalega baráttumaður fyrir mannréttinndum í gamla Austur-Þýskalandi. Hann verður forseti eftir hneykslismál sem felldi fyrri forseta – en Angela Merkel hefur alls ekki viljað sjá hann á forsetastóli.

Nú er hann undir smásjá – það er tekið eftir því hvort fötin hans eru krumpuð og hvort hann mætir á fundi með plastpoka þar sem stendur HM 2006, eins og hann gerði nýlega.

Margir hafa trú á honum. Hann virkar öðruvísi en hefðbundinn forseti – og sumir telja að hann geti haft mikilvæga hluti að segja þjóð sinni, ekki ólíkt Richard Von Weizsäcker, sem er síðasti forseti Þýskalands sem talaði um alvöru mál þannig að eftir var tekið.