Zoe Williams skrifar í Guardian og segir að femínistar verði að leggja áherslu á fjölbreytileika, en ekki eina kreddu. Kreddufesta sé vandamál í kvennahreyfingunni í dag. Femínisminn eigi að rúma margs konar viðhorf – sem sum væru nánast kölluð trúvilla í dag.

Williams, sem sjálf er femínisti,  segir að mitt í öllu talinu um vændi, klám, klámvæðingu og útlitsdýrkun vilji gleymast að þá sé það baráttan fyrir jafnrétti sem skipti mestu máli.

Sjálfur verð ég að segja að ég sakna orðsins „jafnréttisbarátta“. Mér finnst eins og orðið „femínismi“ hafi komið frekar seint inn í málið. Í hugum margra hefur það núorðið mjög neikvæða merkingu – það er útilokandi.

Ég ætla ekki að segja að orðið sé ónýtt – en jafnrétti hefur óm af hugsjónum frönsku byltingarinnar og baráttunni gegn kúgun í gegnum aldirnar.