Í gær var dagur stórra frétta.

Kannski var stærsta fréttin dómur Hæstaréttar í Exetermálinu. Það sætir miklum tíðindum að Hæstiréttur komist að svo gjörólíkri niðurstöðu en Héraðsdómur.

Héraðsdómur sýknaði á mjög einkennilegri forsendu, að vissulega hefðu sakborningarnir brotið reglur sparisjóðsins Byrs en að það hefði ekki verið „ásetningur“ þeirra. Þess má geta að dómari í Héraðsdómi var Arngrímur Ísberg, sá sem hefur sætt mikilli gagnrýni fyrir hvernig hann fór með Baugsmál á sínum tíma. Bent hefur verið á að settur meðdómari í málinu, Einar Ingimundarson, sem dæmdi eins og Arngrímur, hafi hugsanlega verið vanhæfur.

Hæstiréttur dæmir tvo sakborninga í fjögurra og hálfs árs fangelsi. Þeir eru taldir hafa misnotað stöðu sína hjá Byr og framið umboðssvik.

Exeterdómur Héraðsdóms var áfall fyrir sérstakan saksóknara, hann setti spurningamerki við hvort starf hans hefði yfirleitt einhvern tilgang. Dómur Hæstaréttar segir að hægt sé að fá sakfellingu vegna hvítflibbabrota.