Meirihluti stjórnskipunar- og eftirlitsnefndar Alþingis samþykkti í dag að leggja til að kosið verði um tillögur Stjórnarskrárráðs samhliða forsetakosningum 30. júní.

Nú er ekki seinna vænna – málið fer fyrir Alþingi sem verður að ákveða að halda þjóðaratkvæðagreiðsluna fyrir næstu mánaðarmót, annars er það of seint.

Líklegt er að þetta mæti mikilli andstöðu í þinginu, frá Sjálfstæðisflokknum og líklega hluta Framsóknarflokks. Það er ekki óhugsandi að komi til málþófs.

Sennilega er þó meirihluti í þinginu fyrir því að fara þessa leið.

En málið stendur samt tæpt. Þarna er gert ráð fyrir að greidd séu atkvæði um stjornarskrána eins og hún kom frá Stjórnlagaráði, en þó á að taka út fimm atriði og spyrja sérstaklega um það – það er ákvæði um auðlindir, um persónukjör, um fjölda þeirra sem geta krafist þjóðaratkvæðagreiðslu, um atkvæðavægi og persónukjör.

Ríkisstjórninni liggur á með málið – það er ekki nema ár eftir af starfstíma hennar. Stjórnarskrá þarf að samþykkja á tveimur þingum, með kosningum í milli.

Þjóðaratkvæðagreiðslan er eingöngu ráðgefandi, hún er eins konar skoðanakönnun – en þó hlýtur að teljast víst að stjórnarskrártillögunum verði hent ef þau yrðu beinlínis felld í atkvæðagreiðslunni.

Enn er ekki komið í ljós hvort Ólafur Ragnar Grímsson fær alvöru mótframbjóðendur. Það verður þó að teljast heldur líklegt. Þá gætu orðið spennandi forsetakosningar og á sama tíma atkvæðagreiðsla um alveg nýja stjórnarskrá. Það er dálítið stór pakki í sumarkosningum – það er lítil hefð fyrir því að kjósa á sumrin á Íslandi, nema í þau fáu skipti að hefur verið alvöru forsetakjör.