Íslenski skálinn á bókasýningunni í Frankfurt var svo góður af því hann byggði á einfaldri hugmynd: Fólki að lesa bækur.

Það var nánast eins og að fara inn í helg vé bóklestrar að koma inn í skálann og sjá fólk lesa bækur á stórum kvikmyndatjöldum.

En um leið var gott að vera inni í skálanum. Þar var þægilega rökkvað, hægt að setjast í stól eða bara út við vegg og taka þátt í athöfninni – lesa bók.

Allir útlendingar sem ég talaði við mærðu íslenska skálann. Alsírski rithöfundurinn Boualem Sansal – einn hugrakkasti maður sem ég hef hitt – sagði að sá sem hannaði skálann ætti að fá medalíu.

Nú hefur það gengið eftir, því Sögueyjan, Sagenhaftes Island, fékk í dag stór verðlaun í Þýskalandi.