Nú á að hætta að gefa Encyclopedia Britannica – frægustu alfræðibók heims – út í bókarformi eftir 244 ár,

Skýringin er kannski einföld: Það eru 3,9 milljón greinar í ensku Wikipedia, en í bókarútgafu Encyclopedia Britannica eru 120 þúsund færslur.

Bragi Kristjónsson segir mér að hér áður fyrr hafi Britannica alltaf selst þegar hún kom í búðina hjá honum – svo sé ekki lengur.

Britannica verður áfram til á netinu – en þetta eru vissulega ákveðin tímamót. Britannica er eins og klettur með sínum 32 bindum meðan Wikipedia er grautur sem allir geta hrært í.

Kannski átta menn sig ekki á því hversu alfræðibækur eru merkilegur hlutur. Kirkjan vildi halda þekkingu frá alþýðu manna, aðgengi að upplýsingum var sama og ekkert – upplýsingin fór saman við ritun alfræðbóka enda áttu allir að geta fundið þá þekkingu sem þeir leituðu í heiminum, svo notuð séu orð Diderots, hins mikla franska upplýsingamanns og alfræðibókahöfundar.