Jóhanna Sigurðardóttir talaði um forseta lýðveldisins í dag. Hún segir að hann sé að færa sig lengra út á svið stjórnmálanna.

Það má ekki gleyma því að mestallur flokkur Jóhönnu klappaði þegar Ólafur Ragnar steig stærsta skrefið í þá átt, þegar hann neitaði að undirrita fjölmiðlalögin 2004.

Þá máttu flokksfélaga Jóhönnu ekki til þess hugsa að málskotsrétturinn yrði tekinn af forseta.

Í tillögum Stjórnlagaráðs er skilningur Ólafs Ragnars á forsetaembættinu í raun staðfestur. Jóhanna vill að þessar tillögur fari í þjóðaratkvæðagreiðslu.

En ríkisstjórnarflokkunum er mjög í nöp við Ólaf Ragnar. Ástæðan er auðvitað sú að hann hafnaði Icesave-samningi tvívegis og greip þannig fram fyrir hendurnar á stjórninni.

Eftir þessa ræðu Jóhönnu er líklegra en áður að forsetakosningarnar snúist upp í baráttu milli ríkisstjórnarflokkanna og Ólafs Ragnars.

Í slíkri rimmu er sennilegra að Ólafur Ragnar hafi sigur.