Eins og hefur komið fram leitar hópurinn Betri valkost á Bessastaði ákaft af forsetaframbjóðanda gegn Ólafi Ragnari.

Ragna Árnadóttir virðist gefa þetta nokkuð eindregið frá sér.

En Stefán Jón Hafstein virkar heitur. Hann er reyndar staddur í Malawí – þar er heitt – en hann tekur ekki ólíklega í framboð á Facebook. Á einum stað segir hann að hann geti þetta ekki einn.

Stefán hefur haldið uppi beittri ádeilu á spillingu á Íslandi – eins og lesa mátti í nýlegu hefti Tímarits Máls og menningar og sjá mátti í viðtali í Silfri Egils nú stuttu eftir áramót.

Framboð hans yrði þannig fráleitt upp á punt.

Það gæti þó háð Stefáni að hann er meðlimur í Samfylkingunni – það væri hægt að líta á hann sem forsetaefni Samfylkingarfólks. Á Facebook síðunni Betri valkost á Bessastaði er fólk úr Samfylkingunni langmest áberandi.

Stefán gæti verið sterkur frambjóðandi, hann er mælskur og rösklegur – og hefur hugsað margt um þjóðfélagsmál síðustu árin. Ferill í hjálparstarfi getur ekki skaðað.

En svo gæti hann reyndar farið aðra leið og tekið að sér formennsku í Samfylkingunni, hann er kannski formaðurinn sem þann flokk vantar svo sárlega?