Richard Barley skrifar í Wall Street Journal og veltir upp þeirri spurningu hvort landið hafi komið betur út úr kreppunni, Írland eða Ísland.

Hann segir að margir myndu segja Ísland, til skamms tíma litið.

Lánshæfismat Íslands var hækkað hjá Fitch á föstudag meðan Írland er enn í ruslflokki.

Hagkerfi beggja landanna féllu vegna þess að bankakerfið óx þeim yfir höfuð. Barley segir að það hafi að sumu leyti verið gæfa Íslands að bankakerfið varð tíu sinnum stærra en þjóðarframleiðslan, það þýddi að ekki nokkur leið var til að bjarga því. Á Írlandi var bankakerfið smærra, og þess vegna var ráðist í dýrar björgunaraðgerðir.

Harvey segir að kostnaðurinn við að endurfjármagna bankana hafi verið svipaður í báðum löndunum, 45 af þjóðarframleiðslu á Íslandi og 40 prósent af þjóðarframleiðslu á Írlandi. Í báðum löndum hafi þjóðarframleiðslan dregist saman um 12-13 prósent.

Skuldir ríkjanna séu svipaðar, þó aðeins lægri á Íslandi.

Það sem geri gæfumuninn nú sé að það sé 3 prósenta hagvöxtur á Íslandi, en 1 prósent á Írlandi.

Þetta kunni hins vegar að vera breytingum undirorpið. Íslendingar séu enn með gjaldeyrishöft sem hamli fjárfestingum. Það séu miklar efasemdir um vaxtarmöguleika á Íslandi. Írland sé líklegra til að laða til sín fjárfestingu og þar skipti evruaðildin sköpum. Í fyrra hafi meira að segja orðið 30 prósenta auking á fyrirtækjum sem voru að fjárfesta á Írlandi í fyrsta skipti.