Eva Joly fór í heimsókn til Aþenu nú í vikunni. Þar sagði hún að þyrfti að leggja drög að nýjum samfélagssáttmála sem byggði á samheldni. Hún sagði að réttast væri að slíkur sáttmáli yrði til í Aþenu þar sem er vagga vestræns lýðræðis.

Joly sagði að það væri nauðsynlegt að sýna að það sé til önnur Evrópa en sú sem Merkel og Sarkozy standa fyrir, og aðrar leiðir en þær sem Alþjóða gjaldeyrissjóðurinn og Evrópski seðlabankinn eru að þröngva upp á Grikki.

Joly sagði að það væri óheiðarlegt að krefjast niðurskurðar af grísku þjóðinni á sama tíma og ekkert sé gert til að endurheimta fé sem grískir auðmenn hafa dælt í fjármagnsparadísir.

„Niðurskurðurinn sem við krefjumst af Grikkjum mun breiðast út um Evrópu og eyðileggja samfélagskerfi okkar. Við þurfum að verja þetta kerfi og ekki fórna því á altari öfgafrjálshyggju.“

Joly hvatti líka Grikki til að sýna heiminum merki um að þeir gætu barist gegn spillingu og fjársvikum. Þeir yrðu að nota reiði sína til að bæta dómskerfið – sem þykir afar spillt og stirt í vöfum.

Joly talar fyrir hlutum hefur oft verið bannhelgi á í Frakklandi, hún sagði að Frakkar ættu að draga til baka vopnasölusamninga sem þeir hafa gert – og hvatti til þess að Grikkir skæru verulega niður útgjöld til hermála, en þeir hafa verið mjög tregir til þess. Grikkjum þykir afar þýðingarmikið að hafa her, gráan fyrir vopnum, andspænis Tyrklandi.

Eva Joly í Aþenu ásamt rithöfundinum og stjórnmálamanninum Manolis Glezos. Glezos er fæddur 1922 og er frægur fyrir veru sína í andspyrnuhreyfingunni í stríðinu. Hann var handtekinn og pyntaður, og aftur var hann handtekinn og lokaður inni í fangelsi í langan tíma á valdaskeiði herforingjastjórnarnnar 1967-1974. Glezos hefur setið meira en ellefu ár í fangelsi fyrir skoðanir sínar. Frægasta dáð Glezos er þegar han klifraði upp á Akropolishæð ásamt Apostolos Santas 30. mai 1941 og reif niður hakakrossfánann sem þar hafði verið við hún síðan Þjóðverjar tóku borgina viku áður.