Greining mín á pólitíkinni frá því í gær er staðfest í skoðanakönnun sem birtist í Fréttablaðinu í morgun.

Ný framboð bítast aðallega um fylgið á vinstri vængnum en lítt er hróflað við fylgi Sjálfstæðisflokksins. Það mælist 35 prósent – sem þýðir reyndar engan stórsigur fyrir Sjálfstæðisflokkinn, en að þeir myndu samt stefna í að vera langstærstir eins og á velmektarárunum.

Samfylkongin er komin niður í 12 prósent og Vinstri grænir í 8 prósent. Könnunin hlýtur að valda skelfingu í þeim herbúðum.

Björt framtíð er ekki að mælast vel, með aðeins 6 prósent – það vantar greinilega slagkraftinn þar  og þetta eru vond tíðindi fyrir flokkinn, gæti valdið því að erfitt verði að afla nýrra liðsmanna.

Samstaða Lilju Mósesdóttur kemur inn með 21 prósent. Það gefur henni mikinn byr í seglin.

Þetta er kannski ekki staðan eins og hún yrði í kosningum, en þarna eru sterkar vísbendingar. Lilja hefur verið óþreytandi við að boða úrlausn fyrir skuldug heimili – ég held að það sé ekki mjög djarft að halda því fram að þar liggi meginskýringin á fylgi hennar.