Ég var í bókabúð að fletta yfirliti Newsweek – eða var það Time – yfir árið 2011.

Maður skyldi ekki ætla það eftir fjölmiðlaumfjöllun ársins, en í raun var þetta friðsælt ár.

Það er lítið um styrjaldir í heiminum, friðsamlegt um að litast víðast hvar.

Velmegun er líka útbreiddari en áður – lönd eins og Kína, Brasilía, Tyrkland og Indland sækja enn fram. Í Norður-Afríku hafa orðið byltingar sem stefna í lýðræðisátt.

Evrópa og Bandaríkin eiga í fjárhagsörðugleikum, í Afríku ríkir víða skelfileg fátækt – en það er samt ekki hægt að segja annað en að þetta hafi verið þokkalegt ár á heimsvísu.

Kort frá Global Peace Index sýnir stríð og frið í heiminum, grænu löndin eru þau friðsömustu, í svörtu löndunum eru stríðsátök. Þar má sjá Súdan, Sómalíu, Afganistan og Írak.