Það er merkilegt ef satt er að Ingibjörg Sólrún Gísladóttir sé búin að segja sig úr Samfylkingunni – sjáfur fyrrverandi formaður flokksins og í rauninni stærsta nafnið í sögu hans. DV skýrir frá þessu. Maður bíður frekari frétta.

Það er þó erfitt að trúa því að það sé vegna einhvers námskeiðs sem Jón Baldvin Hannibalsson er að fara að halda. Jón Baldvin er hvarf frá virkri þátttöku í stjórnmálum fyrir mörgum árum og hann hefur enga sérstaka valdastöðu innan flokksins. Milli hans og formannsins, Jóhönnu Sigurðardóttur, er lítil vinátta – áhrif hans eru ekki mikil.

Þess er þá að gæta að Ingibjörg Sólrún var nánast einráð í flokknum á árunum frá 2005 til 2008. Hugmyndum hennar var fylgt í nánast einu og öllu. Það endaði ekki vel og hún þurfti að segja af sér eftir hrunið – átti þá reyndar við veikindi að stríða. En hún hefði þurft að hverfa frá þrátt fyrir þau.

Nú er hún komin til Afganistan í hjálparstarf. Hún starfar þar fyrir UN Women á tíma þegar hagur kvenna er að versna aftur og herir vestursins eru að leita leiða til að tygja sig brott. Þetta er varla auðvelt verkefni – og það ber vott um hugrekki að takast það á hendur. Hins vegar er ekki víst að það sé jafn mikil reisn yfir því að yfirgefa flokk sem Ingibjörg sjálf teymdi út í ógöngur.