Það er engin smá fjárhæð sem var greidd út úr þrotabúi Landsbankans í dag – 432 milljarðar króna. Og það er gert ráð fyrir að heimtur úr þrotabúinu dugi fyrir Icesave skuldinni.

Þá er ljóst hversu fánýtt það væri ef höfðað væri dómsmál vegna þessa. Um hvað á dómsmálið að standa – þá einhliða ákvörðum Breta að greiða þeim sem áttu innistæður á Icesavereikningum stuttu eftir hrun?

Það að Íslendingar hafi ekki staðið við innistæðutryggingar – hvernig er þeim málum annars háttað í Evrópu nú þegar efnahagskerfið þar riðar til falls?

Mismunun – eru ekki erlendu innistæðueigendurnir að fá sitt?

Ef sanngirni réði væri Icesavemálið endanlega úr sögunni þegar þrotabúið er búið að borga – og Íslendingar ættu að leggja ríka áherslu á að það verði lendingin.

Þetta var eitt af því sem við Árni Páll Árnason ræddum í Silfrinu á dögunum. Hann sagði að stefna ráðuneytis síns sem fer með Icesave væri að koma í veg fyrir dómsmál.

Um leið hefur maður heyrt áhyggjur af því að Icesave fari aftur undir forræði Steingríms J. Sigfússonar – sem er illa brenndur af málinu.