Hagfræðingurinn Gustav A. Horn skrifar í Der Spiegel og segir að hik þýsku ríkisstjórnarinnar við að aðstoða Grikki hafi verið mikil mistök sem muni meðal annars orsaka að það verði dýrara en ella að koma gríska ríkinu til hjálpar, bæði fyrir Evrópuríkin og fyrir gríska borgara. Ráðleysi þýsku stjórnarinnar og dramb – sem helgaðist meðal annars af mikilli hatursherferð í götublöðum eins og Bild – virki svo eins og standandi veisluboð fyrir spákaupmenn og vogunarsjóði, og geti líka teflt stöðugleika á Spáni, Portúgal í tvísýnu. Nú sé dýrara og erfiðara að leysa vandann ef hann hefði verið tekinn föstum tökum í upphafi. Grísk skuldabréf eru komin í ruslflokk og álag snarhækkar á skuldir Portúgala og Spánverja. Og enn ráða hin ærulausu matsfyrirtæki á ferðinni.

Fyrir Íslendinga hlýtur þetta að vekja upp margar spurningar: Evran er í krísu. Hún fer lækkandi, sem í sjálfu sér er ágætt fyrir Íslendinga. En er einhver hvati fyrir okkur að vilja taka upp þennan gjaldmiðil eins og aðstæður eru nú – og kannski þá ekki síst í ljósi þess hofmóðar sem hefur einkennt viðbrögð Þjóðverja.