Það var sagt um einn gjaldeyrismiðlarann hjá Kaupþingi að þegar hann fór í mat hækkaði krónan.

Þetta er reyndar ekki í rannsóknarskýrslunni, en þar er fjallað um stórkostlega aðför Kaupþings að krónunni. Tilvitnunin er í Sturlu Pálsson, forstöðumann alþjóða- og markaðssviðs Seðlabankans:

„Þeir ryksuguðu gjaldeyrismarkaðinn og svo þegar þeir eru búnir að því þá hætta þeir að kvóta inn á swap-markaðinn sem gerir það að verkum að í mars 2008 bara hrynur krónan og við stóðum náttúrulega algjörlega ráðþrota í málinu því að þegar þetta gerist fara CDS-in [skuldatryggingaálag] á bankann upp og það eru komnar alls konar áhyggjur af þeim þannig að erlendir aðilar sem eiga krónur þeir bara fara í panik að selja.“

Og ennfremur:

„Í desember 2007 breytist hegðun Kaupþings á millibankamarkaði með gjaldeyri algjörlega. Þeir hætta að selja svo mikið sem evru og þeir verða bara svona svarthol. Frá desember 2007, janúar 2008, febrúar 2008, þá kaupa þeir 2,3 milljarða evra á millibanka-markaði með gjaldeyri.„