Óskar Hrafn Þorvaldsson hefur að mörgu leyti staðið sig vel sem fréttastjóri Stöðvar 2. Hann hefur byggt upp hóp af ungum og áhugasömum fréttamönnum sem eru óhræddir við að takast á við erfið mál.

Fréttirnar á Stöð 2 hafa batnað mikið undir hans stjórn. Óskar er líklega besti fréttastjóri sem Stöð 2 hefur haft í mörg ár. Hann er forkur duglegur, vinnur með fólkinu á gólfinu eins og sagt er.

Óskar kýs að segja af sér vegna fréttaflutnings sem reyndist vera rangur, eða það er látið í veðri vaka. Það er ákvörðun sem maður getur virt – kannski er verst hvað það tók langan tíma að leiðrétta vitleysuna.

Hins vegar segja heimildir að þrýst hafi verið á Óskar að segja upp og honum boðinn starfslokasamningur. Fréttastofa Stöðvar 2 hefur flutt talsvert af fréttum sem hafa verið óþægilegar fyrir Jón Ásgeir Jóhannesson, eiganda 365. Fyrir skemmstu lét Jón Ásgeir uppi mikla óánægju með vinnubrögð fréttastofunnar.

Ég hef áður bent á það að fréttastofan hefur vissa sérstöðu innan fjölmiðlaveldisins, hún á sér 25 ára sögu, félagið sem hún heyrir undir hefur verið í eigu margra ólíkra manna – sumra hafa verið stóreinkennilegir –  og þar ríkir hefð fyrir ákveðnu sjálfstæði í vinnubrögðum. Slíka hefð er ekki að finna á Fréttablaðinu.

Nýi fréttastjórinn, Freyr Einarsson, hefur haft yfirumsjón með þættinum Íslandi í dag. Hann er ágætur fyrir sinn hatt, sem einhvers konar magasín, en fréttaþáttur er hann ekki. Freyr hefur starfað innan yfirstjórnar 365 – það er ekki sérlega gott veganesti fyrir fréttastjóra sem þarf að geta staðið uppi í hárinu á eigendum fjölmiðilsins.

Það er nefnilega erfið staða fyrir fjölmiðil að vera í eigu manna sem eru aðalfréttaefni samtímans.