Það er ekki langt síðan að Jón Ásgeir Jóhannesson var fastagestur í forsetaboðum. Forseti Íslands sníkti far með einkaflugvélum hans og vina hans.

Jón var semsagt í veislum þess sem hefur verið kallað „betra“ fólkið.

Nú er hann búinn að missa allt út úr höndunum á sér, að minnsta kosti í bili, og síðustu fréttir herma að eignir hans á Íslandi hafi verið kyrrsettar.

Það breytir svosem ekki miklu, því menn af þessu tagi passa upp á að setja ekki mikið á kennitöluna sina.

En Jón á ennþá fjölmiðlafyrirtækið 365 – og það virðist vera eina leið hans inn í einhvers konar samkvæmislíf núorðið.

Hann er sjálfur farinn að fara í leiðangra til að kaupa myndefni fyrir sjónvarpsstöðvar sínar, og svo segir DV frá því að hann ætli að skella sér á úrslit American Idol. Þar er hann væntanlega í krafti stöðu sinnar sem eigandi 365.

En þetta er hátt fall. Úr fínustu forsetaveislum í úrslit Idolsins.

Því sú samkoma verður seint talin vera crème de la crème.