Stríð Baugsliðsins og Moggaflokksins er að komast á nýtt plan – heiftin er orðin slík að nú halda engin bönd. Grein sem Jón Ásgeir Jóhannesson skrifar á vef Pressunnar í dag (já, hann er líka kominn þangað) er það sem kalla má einstaklega djúsí. Það má segja að allar gáttir séu að bresta:

Um Einar Sigurðsson, starfsmann skilanefndar Glitnis, sem er almennt talinn maðurinn á bak við núverandi útgáfu Morgunblaðsins, og móður hans Guðbjörgu Matthíasdóttur:

„Við  seldum ekki okkar hlut í Glitni  rétt fyrir hrun eins og aðaleigandi Morgunblaðsins gerði. Voru það innherjasvik? Efast þú um að sonurinn hafi hringt í mömmu sína?  Eins og hann virðist ekki víla fyrir sér þessa dagana til að gauka verðmætum að gildum sjóðum Eyjafjölskyldunnar.  Væri ekki réttast að Eyjafjölskyldan skilaði þeim fjármunum sem hún fékk út úr Glitni og FL fyrir TM, skilaði þeim til þjóðarinnar?   Eða líður henni vel með útrásarpeningana í veskinu? Þeir eru væntanlega nógu góðir til að reka Moggann?“

Um Óskar Magnússon, útgefanda Morgunblaðsins:

„Morgunblaðið hefur áhyggjur af því, hvort ég njóti hlunninda hjá Högum. Forstjóri Haga hefur svarað því í blaðinu. En ég ætla að upplýsa þig um, að útgefandi þinn fékk 40% afslátt af matarúttekt í 5 ár eftir að hann lét af störfum hjá Hagkaup. Ég veit ekki hvort hann greiddi skatta af þeim hlunnindum. Því verður hann sjálfur að svara.“

Um Agnesi Bragadóttur:

„Við  skrif þessi rifjast upp sagan, sem þú sagðir mér einu sinni af leikaranum Davíð þegar hann fór á fjórar lappir  í forsætisráðuneytinu, til að leika  þig í umgengni við þann sem hann taldi þáverandi húsbónda þinn.  Ljóst er að hundurinn hefur fengið nýjan húsbónda.„