Ekki verður betur séð en að Hörður Arnarson, nýr forstjóri Landsvirkjunar, hafi boðað breytingu á stefnu fyrirtækisins á aðalfundi þess í gær.

Í fyrsta sinn er upplýst um raforkuverðið, og það er greinilegt að forstjórinn sjálfur telur það of lágt.

Þarna er ákveðin stefnubreyting í gangi í þá átt að Landsvirkjun verði markaðsfyrirtæki en ekki bara framleiðslufyrirtæki. Að það láti ekki bara ríkisstjórnir um að útvega sér kaupendur að raforku, heldur reyni sjálft að finna kaupendur sem eru tilbúnir að borga hátt verð.

Liður í þvi er, eins og Hörður segir, að leggja sæstreng til Evrópu. Með því er ekki bara hægt að selja raforku inn á hinn stóra Evrópumarkað, heldur gæti líka verið hægt að mynda þrýsting á álfyrirtækin að greiða hærra verð fyrir orkuna.

Það vekur athygli í því sambandi að Hörður á sér forsögu í viðskiptalífinu, hann var áður forstjóri hjá Marel, er doktor í verkfræði – en ekki aflóga pólitíkus eins og tíðkast hefur að setja í svona djobb á Íslandi.