Ég birti hér á síðunni í gærkvöldi fyrirvara við Icesave samninginn sem ræddir hafa verið í fjárlaganefnd Alþingis. Þetta birtist svo víðar í morgun, meðal annars í Morgunblaðinu.

Stjórnarliðar á Alþingi bregðast illa við þessu eins og sjá má á þessari frétt RÚV. Það var jafnvel rætt um að leki af þessu tagi varðaði við landráð:

„Ásta Ragnheiður Jóhannesdóttir, forseti Alþingis, sagði í samtali við fréttastofu að málið væri grafalvarlegt og verið sé að skoða það, það verði meðal annars rætt á fundi með lögfræðingi Alþingis, hvernig bregðast eigi við því. Fréttastofa hefur heimildir fyrir því að svo alvarlegt hafi þetta lekamál þótt, að í morgun var það nefnt í fullri alvöru að kannað yrði hvort lekinn varði við ákvæði 91. greinar almennra hegningarlaga um landráð. Þar segir að hver sem kunngeri, skýri frá eða láti á annan hátt uppi við óviðkomandi menn leynilega samninga, ráðagerðir eða ályktanir ríkisins um málefni, sem heill þess eða réttindi gagnvart öðrum ríkjum eru undir komin, eða hafa mikilvæga fjárhagsþýðingu eða viðskipta fyrir íslensku þjóðina gagnvart útlöndum, skuli sæta fangelsi allt að 16 árum.“

Hvað varð um allt talið um gegnsæi og um að allt skyldi vera uppi á borðum – ætluðum við ekki að stefna í áttina að nýrri og betri stjórnsýslu?