Það er talað um að ríkisstjórnin kunni að springa vegna Icesavemálsins.

Ríkisstjórninni er að sumu leyti vorkunn, þjóðarbúið var hrunið þegar hún kom að því, flestir leikir hennar eru í raun þvingaðir vegna afleitrar stöðu Íslands.

Það var ljóst að hvaða ríkisstjórn sem er hefði orðið óvinsæl í þessari stöðu. Annað er ekki í boði.

En margt  hefur henni mistekist. Henni hefur til dæmis ekki tekist að sýna að hún beri hag heimilanna í landinu almennilega fyrir brjósti. Og ennþá upplifum við dæmalausa linkind gagnvart fjárglæframönnunum sem settu þjóðina á hausin.

En óeining vegna Icesave gæti orðið banabitinn.

Það kannski eftir öðru í sögu vinstri hreyfingarinnar á Íslandi. Stjórnin sem situr núna er – að minnsta kosti á yfirborðinu – hreinræktaðasta vinstri stjórn í sögu þjóðarinnar. Í fyrri vinstri stjórnum hefur Framsókn alltaf verið með.

Hvað ætli verði langt í næstu vinstri stjórn ef þessi springur?

Og hvað ætli taki við?

Það verður ekki unað við að landið búi lengi við stjórnarkreppu. Alþingi getur ekki boðið þjóðinni upp á það.

Er hugsanlegt að Sjálfstæðisflokkur, Framsókn, Borgarahreyfing og einhverjir þingmenn úr VG undir forystu Ögmundar myndi stjórn til þess að semja upp á nýtt um Icesave?

Eða fengjum við kannski á endanum stjórn Samfylkingar og Sjálfstæðisflokks, en nú með Samfylkinguna í forsæti?

Kosningar eru auðvitað möguleiki líka.

Þá hlyti að vera kominn tími á nýjar stjórnmálahreyfingar – enda ljóst að gamla sýstemið er um það bil gjaldþrota.