David Cameron, formaður Íhaldsflokksins, hefur sett ofan í við Íslandsvininn Daniel Hannan og segir að skoðanir hans á breska heilbrigðiskerfinu séu einkennilegar.
Hannan, sem er Evrópuþingmaður, fyrir Íhaldsflokkinn, hefur komið fram á Fox News í Bandaríkjunum og sagt hryllingssögur af breska heilbrigðiskerfinu, NHS. Hann telur kerfið vera argasta sósíalisma og vill að það verði lagt niður.
Þannig leggur Hannan lóð á vogarskálar bandarískra repúblikana sem berjast nú eins og óðir gegn hugmyndum Obamas forseta um almennar heilbrigðistryggingar. Hannan varar Bandaríkjamenn við að taka þær upp.
En NHS er Bretum mjög kært og enginn stóru flokkanna í Bretlandi vill hrófla við því. Cameron sjálfur segir að þetta sé merkasta stofnun í landinu.
Hannan hefur nokkrum sinnum komið til Íslands og lagt sitt af mörkum í umræðum um landið. Til skamms tíma leit hann á það sem einhvers konar thatcheríska frjálshyggjuparadís og talaði mikið um íslenska efnahagsundrið.
Hann mun hafa komið til álita sem ræðumaður á útifundi til að mótmæla Icesave, en frá því var horfið.
Hér er frétt Guardian um Hannan og Cameron.
Og hér má sjá Hannan á Fox News.
[youtube=http://www.youtube.com/watch?v=Hgt763qTrBo]
