Það er varla um fjölgun ferðamanna að ræða á Íslandi, en hegðun þeirra er kannski öðruvísi.

Nú hafa þeir loks efni á því að drekka áfengi hér og borða á veitingahúsum.

Á Akureyri um daginn varð ég vitni að því sem ég hef ekki áður séð: Hóp ungra bakpokaferðalanga þamba bjór eftir bjór á frekar dýru veitingahúsi.

Norður í landi var varla hægt að fá borð á veitingahúsum nú í ágúst. Það voru biðraðir fyrir utan Greifann og Bautann og Hótel Reynihlíð.

Þegar ég var í Grikklandi í sumar kom það mörgum á óvart að ekki varð jafnmikið hrun í ferðamennsku og spáð hafði verið.

Ferðamennirnir komu, en þeir voru seinni til að bóka. Bretar fóru að hugsa sér til hreyfings þegar leið á sumarið; þar hefur verið með eindæmum rigningasamt.

Og eins og venjulega berast fréttir af Bretum sem eru að skandalísera og fara sér að voða á Krít, Rhodos og Kos. Þar hefur ástandið verið skárra en búist var við.

En dýru staðirnir hafa orðið verr úti, eyjar eins og Santorini og Mykonos þar sem þykir sjálfsagt að okra á fólki.