Lesandi síðunnar sendi þetta bréf, á deginum þegar evran fór í 182 krónur:

— — —

Hefur þú fylgst með krónunni síðustu daga? Hún sýnist vera í frjálsu falli.

Á sínum tíma var sagt að nauðsynlegt væri að rekja DO og fá „fagmann“ í starfið. Norðmaðurinn var ráðinn og hann sagði það allgjört forgangsverkefni sitt og sérstakt áherslumál að vinna að því að styrkja krónuna.

Síðan þá hefur hún fallið um minnst 20%.

Stuðningsmenn þess að Ísland sækti um aðild að ESB héldu því mjög á lofti að umsóknin ein myndi hafa jákvæð áhrif og m.a. reynast fallin til að auka trú manna á íslensku efnahags- og fjármálalífi. Þar með myndi gengi krónunnar styrkjast.

Þetta hefur augljóslega ekki gengið eftir.

Það vekur furðu mína að fjölmiðlar skuli ekki tala við seðlabankastjórann, rifja upp ummæli hans, og spyrja hann hvernig honum þyki hafa tekist til.

Hvers vegna eru ráðamenn þjóðarinnar og talsmenn ESB-aðildar í ríkisstjórn og á þingi ekki spurðir hverju þetta sæti?

Sjálfur teldi ég einna áhugaverðast að heyra sjónarmið norska seðlabankastjórans sem lýst yfir því þegar hann tók við embætti að helsta verkefni sitt yrði að styrkja krónuna.

Hvernig skyldi honum þykja hafa til tekist nú þegar líður að því að hann hverfi úr embætti?
Ætli forsætisráðherra og helstu gosar Samfylkingarinnar séu sama sinnis?

Þetta vekur a.m.k mikla furðu mína.