Er möguleiki á að Vinstri græn verði stærri en Samfylkingin? Og Steingrímur geti þá gert kröfu til að verða forsætisráðherra?

Það virðist ekki vera óhugsandi – fjöldamargir kjósendur eiga eftir að gera upp hug sinn. Flestir sem ég hitti segjast ekki vita hvað þeir ætla að kjósa.

Samfylkingin kýlir allt í einu á mjög harða afstöðu í Evrópumálum. Þetta er greinilega flokkslínan síðustu dagana fyrir kosningar, þá væntanlega til að reyna að trekkja evrópusinnaða kjósendur frá Sjálfstæðisflokknum.

Þetta virkar óneitanlega ansi tækifærissinað, sérstaklega þegar bankamálaráðherra síðustu ríkisstjórnar fer að setja Evrópu sem skilyrði um stjórnarsamstarf við VG.

Hvað ætlar flokkurinn að standa fast á því?

Sjálfstæðisflokkurinn er í sífelldu tjóni. Forysta flokksins virðist vera mjög óviss um hvaða skilaboð hún eigi að senda frá sér. Þau breytast frá degi til dags. Það þýðir lítið að ráðast á sendiherra ESB sem segir að ekki sé hægt að taka upp evruna í gegnum Alþjóða gjaldeyrissjóðinn.

Það er spurning hvar botn Sjálfstæðisflokksins liggur – er hann 30 prósent, 25 prósent, eða jafnvel ennþá lægri?