Amanda Dingli frá Caernarfon í Wales segir að mynd frá ferðalagi hennar um Ísland hafi breytt lífi hennar. Síðan þá hefur hún misst tæplega 20 kíló og hjálpar öðrum að ná markmiðum sínum. Hún segir frá þessu í viðtali við North Wales Chronicle.
Amanda var um 78 kíló og er í dag 59 kíló.
„Líf mitt tók dramatíska stefnu þegar ég var nýkomin úr langtímasambandi og unglingssonur minn flutti erlendis. Skyndilega bjó ég ein og hafði ekkert til að einbeita mér að. Ég hafði engar afsakanir eins og ég þyrfti að sjá um son minn, eða elda kvöldmat, eða þrífa húsið,“ segir hún.
Í gegnum árin hafði Amanda reynt hinar ýmsu aðferðir til að grennast.
„Ég vildi létta mig en ég áttaði mig ekki á því hversu mikið ég væri búin að þyngjast fyrr en ég sá myndir frá ferðalagi mínu um Ísland. Enginn segir við þig: „Jesús þú ert búin að bæta svo mikið á þig!“ Og ég virkilega hélt að ég væri ekki svona stór fyrr en ég sá myndirnar,“ segir Amanda.
„Loksins hafði ég ástæðu til að gera eitthvað fyrir mig sjálfa og ekki til að gera einhvern annan hamingjusaman.“
Amanda byrjaði hjá Weight Watchers í febrúar 2017 og er þjálfari þar í dag. Hún segir að fyrstu mánuðirnir hafi ekki verið auðveldir en þetta sé allt þess virði.
Um mánuði eftir að hún tók mataræðið í gegn byrjaði hún að hreyfa sig.
„Að ná markmiði mínu, miðvikudaginn 6. desember 2017, var yfirþyrmandi upplifun. Ég grét af ánægju,“ segir hún.
Henni hefur tekist að halda aukakílóunum af sér og vill hjálpa öðrum að byrja sitt ferðalag.