Tyler Gwozdz, sem aðdáendur raunveruleikaþáttanna Bachelorette kannast eflaust við, lést á miðvikudag. Tyler var 29 ára en hann tók þátt í fimmtándu þáttaröð þessara vinsælu þátta.
Tyler var fluttur í skyndi á sjúkrahús þann 13. janúar síðastliðinn vegna gruns um ofneyslu lyfja. Í símtali til neyðarlínunnar, sem blaðamenn TMZ hafa fengið að hlusta á, kemur fram að hann hafi fundist inni á lokuðu baðherbergi. Grunur léki á að hann hefði tekið heróín.
Ekki er búið að gefa út opinbera dánarorsök en líklega munu nokkrar vikur líða þar til það gerist.
Tyler vakti athygli í þáttaröðinni þar sem fjöldi karla barðist um hylli Hönnuh Brown. Hann fór á stefnumót með Hönnuh, sem gaf honum rós, en síðan hvarf hann úr þáttunum á dularfullan hátt eftir þriðju vikuna. Margir veltu fyrir sér hvað hefði komið upp á en engin opinber skýring var gefin.