Ashley sem er svokölluð „plus size“ eða „curvy“ fyrirsæta er harður málsvari jákvæðrar líkamsímyndar og draumur hennar er að öllum konum líði vel í eigin skinni, óháð stærð og vaxtarlagi. Hún hefur verið dugleg að breiða út boðskapinn bæði í leik og starfi og árið 2016 varð hún fyrsta fyrirsætan í fatastærð 16 sem prýddi forsíðu sundfataútgáfu tímaritisins Sports Illustrated. Hún fer einnig mikinn á samfélagsmiðlum og gerir í því að sýna líkama sinn frá öllum sjónarhornum. „Ég vil að fólk átti sig á því að við höfum öll eitthvað sem samfélagið kennir okkur að hylja en af hverju gerum við það? Svo að ég sýni allt mitt og er stolt.“
Ashley og maðurinn hennar eignuðust sitt fyrsta barn í janúar, soninn Isaac, og hún segist hafa þurft að sættast við nýja líkamann. „Ég er þyngri. Ég er með slit og í byrjun þurfti ég að tala mig til og hugsa; ok, nýr líkami kallar á nýjan hugsunarhátt,“ segir Ashley sem segir þessa nýjustu myndibirtingu hafa hjálpað sér í þeim efnum. „Myndatakan var svo valdeflandi því mér leið vel og fannst ég líta vel út. Þetta er nýi mömmulíkaminn minn,“ segir Ashley sem neitaði að láta lagfæra myndina með myndvinnslubúnaði.„Ég vil að fólk sjái mig alveg eins og ég er því allir hafa sögu að segja.“