Andrew prins fór í umtalað viðtal við BBC á dögunum þar sem hann tjáði sig um vináttu sína við níðinginn Jeffrey Epstein og ásakanir ungra stúlkna um að prinsinn hafi haft mök við þær þegar þær voru undir lögaldri. Viðtalið var langt og er það mál manna að Andrew hafi virkað ótrúverðugur og hafa einhverjir jafnvel velt því fyrir sér hvort hann sé haldinn minnisleysi. Viðtalið og tengsl Andrews við Jeffrey Epstein er langt því frá fyrsta hneykslið sem skekur bresku konungsfjölskylduna.
Það vakti mikla furðu árið 1937 þegar að Edward VIII afneitaði konungsstólnum svo hann gæti kvænst félagsverunni Wallis Simpson, sem var tvífráskilin. Enska þjóðkirkjan bannaði Edward að kvæntast fráskilinni konu og því vildi hann ekki krúnuna. Þetta atvik breytti sögunni talsvert því það leiddi til þess að hin tíu ára gamla Elísabet varð Englandsdrottning. Þetta var ekki eina hneykslið sem umvafði Edward og Wallis því þau ku hafa hitt Adolf Hitler margoft og grunaði bresku leyniþjónustuna að Wallis væri að fóðra Þjóðverja með upplýsingum um Bretland. Bresk yfirvöld reyndu að halda því leyndu að hjónunum og Hitler hefði verið vel til vina en vináttan var staðfest í skjali sem birt var árið 1957.
Þegar Karl Bretaprins var aðeins fjórtán ára fór hann á krá í þorpinu Stornoway Harbor og pantaði sér kirsuberjakoníak. Hann vissi ekki að það var blaðamaður á kránni sem fylgdist með öllu saman og víndrykkja unga prinsins leitaði í fyrirsagnir í ýmsum miðlum.
Margrét prinsessa, systir Elísabetar annarrar Bretadrottningar, varð ástfangin af liðsmanni konunglega flughersins, flugstjóranum Peter Townsend, þegar hún var á yngri árum. Eini gallinn var að Peter var kvæntur maður en upp komst um þetta hneyksli árið 1953. Þá skildi Peter við konu sína undir eins og bað um hönd Margrétar. Þetta ævintýri endaði þó tveimur árum síðar þegar að þau slitu trúlofun sinni. Þá varð Margrét ástfangin af ljósmyndaranum Antony Armstrong-Jones og þau giftu sig. Þau hættu saman árið 1976 og skilnaðurinn varð opinber árið 1978. Þá var Margrét sú fyrsta innan konungsfjölskyldunnar til að skilja síðan Henry sjötti skildi á 16. öld.
Anna prinsessa er dóttir Elísabetar Bretadrottningar og Philips prins. Hún gekk að eiga Mark Philips árið 1973 en þau skildu árið 1992. Þegar þau voru enn gift hélt Mark framhjá með nýsjálenska kennaranum Heather Tonkin. Hún varð ólétt og sagan sagði að Mark hefði beðið hana um að fara í fóstureyðingu, sem hún gerði ekki.
Fáir muna kannski eftir því að Karl Bretaprins deitaði eldri systur Díönu, lafði Söruh McCorquodale, áður en hann og Díana felldu hugi saman. Samband Karls og Söruh ku hafa endað því hún vildi ekki giftast honum.
Það varð uppi fótur og fit í Buckingham-höll þegar The Sun skrifaði upp úr símtali á milli Díönu prinsessu og meints elskhuga hennar, James Gilbey, árið 1992. Þá var Díana enn þá gift Karli en James kallaði Díönu gælunafninu „squidgy“ 53 sinnum í samtalinu og sagðist elska hana. Málið fékk viðurnefnið „Squidygate“ út af gælunafninu. Stuttu síðar skrifaði ástralskt tímarit upp úr samtali Karls Bretaprins og núverandi eiginkonu hans, Camillu Parker Bowles. Það símtal var ansi gróft og var kallað „Camillagate“. Í símtalinu klæmdust þau hvort við annað og sagðist Karl meðal annars vilja breyta sér í túrtappa svo hann gæti búið í nærbuxum Camillu.
Það voru ýmis hneyksli sem komu upp í sambandi Karls og Díönu heitinnar. Eitt af þeim var þegar því var haldið fram að Karl væri ekki faðir Harrys Bretaprins. Díana játaði í viðtali að hafa haldið framhjá Karli, til dæmis með hermanninum James Hewitt, en þeir Harry eru sláandi líkir.
Andrew prins hefur vakið usla áður innan konungsfjölskyldunnar, til dæmis þegar hann kynnti Elísabetu drottningu fyrir kærustu sinni, Kathleen „Koo“ Stark árið 1982. Drottningin vissi ekki að Kathleen var klámstjarna en bresku slúðurblöðin skemmtu sér við að birta myndir af nýju kærustunni fáklæddri.
Það fór um Breta þegar kom í ljós að George V og Mary drottning höfðu eignast sjötta barnið, John prins. Hann fæddist árið 1905 en dó aðeins þrettán ára gamall árið 1919. Hann var með flogaveiki og var haldið í einangrun og tilvist hans leynt fyrir heiminum þar til eftir dauða hans. Konungsfjölskyldan leit á flogaveikisköstin sem veikleikamerki og því fékk almenningur ekkert að vita.
Aftur að Andrew prins, eða fyrrverandi eiginkonu hans, Söruh Ferguson. Hún var gripin af News of the World árið 2010 og sökuð um að falast eftir mútugreiðslum frá blaðamanni til að koma á sambandi á milli blaðamannsins og Andrews prins.
Svo eru það bræðurnir Harry og Vilhjálmur. Harry hefur verið duglegur að hneyksla í gegnum tíðina. Hann fækkaði til dæmis fötum í teiti í Las Vegar árið 2012 og myndunum var lekið til The Sun. Þegar hann var sautján ára var hann sendur í eins dags meðferð eftir að hafa játað fyrir föður sínum að hafa prófað marijúana nokkrum sinnum, sem og áfengi. Svo þurfti Harry einnig að þola miklar ákúrur þegar hann mætti sem nasisti í búningapartí og myndum af því var lekið í fjölmiðla. Hann baðst afsökunar á því og sagði valið á búningnum óheppilegt. Þá var Vilhjálmur einu sinni staðinn að því að dansa ögrandi dans við áströlsku fyrirsætuna Sophie Taylor, eftir að hann byrjaði með Kate Middleton. Kate Middleton fór síðan í mál við tímaritið Closer eftir að það birti myndir af henni berri að ofan í sólbaði árið 2012. Kate vann málið og þurfti Closer að borga 118 þúsund dollara í skaðabætur.
Eftir að Harry festi ráð sitt og byrjaði með leikkonunni Meghan Markle skók annað hneyksli prinsinn, nú vegna tengdaföður hans. Meghan þurfti að ganga sjálf upp að altarinu þegar hún gekk að eiga Harry því faðir hennar, Thomas Markle, mætti ekki. Þau feðginin eru ekki í góðu sambandi eftir að Thomas rasaði út í fjölmörgum blaðaviðtölum um dóttur sína í aðdraganda brúðkaupsins.
