Söngkonan Jessica Simpson opinberaði það nýverið á Instagram að hún hafi náð að létta sig um 45 kíló á aðeins sex mánuðum eftir að hún fæddi sitt þriðja barn, dótturina Birdie Mae, í mars. Systir Jessicu, Ashlee Simpson, ljóstraði upp í viðtali við Us Weekly hvernig systir hennar fór að þessu.
„Staðfesta! Það virkar,“ segir Ashlee í samtali við tímaritið. „Ég meina, hún er búin að leggja svo hart að sér og lítur stórkostlega út.“
Jessica opnaði sig sjálf um þennan árangur í viðtali við HSN síðastliðinn fimmtudag, en auk Birdie Mae á hún einnig dótturina Maxwell, sjö ára, og soninn Ace, sex ára, með eiginmanni sínum, Eric Johnson.
„Þetta hefur verið erfiðisvinna. Ég verð að segja frá því að ég hef lagt mjög hart að mér. Allt sem ég hef borðað er aðallega búið til úr blómkáli,“ sagði Jessica og gaf almenningi eitt gott ráð. „Mér finnst mikilvægt að skrifa niður það sem maður borðar til að halda sér á mottunni.“
Í viðtalinu við HSN sagði Jessica enn fremur að hún hafi ávallt þyngst mikið á meðgöngum.
„Ég bjóst ekki við að þyngjast svona mikið með þriðja barn. Ég hélt að ég hefði lært lexíuna mína en svona er ég greinilega af Guði gerð – mjög svöng og ólétt.“
