Kona varar kattaeigendur í miðbænum við manni sem hún sá vera að setja harðfisk á gatnamót í miðbænum.

„Ég vil vara kattaeigendur í miðbænum við að það er einhver helvítis ónytjungur að planta harðfiski á mitt hringtorgið á gatnamótum Freyjugötu og Baldursgötu.“ 

Um er að ræða gatnamót Baldursgötu og Þórsgötu, en líklegt er að konan hafi ruglast á götuheitum enda í áfalli eftir atvikið. 

„Stendur svo bara þarna og virðist bíða eftir að einhver komi og keyri yfir kettina sem þyrpast þarna að. Viðbjóðslegur maður. Vildi vara kattareigendur sem eru þarna við. Við tókum harðfiskinn og settum upp á gangstétt á meðan hann stóð þarna og gargaði eitthvað. Það var þarna einn svartur og hvítur loðinn köttur og einn appelsínugulur og hvítur að gæða sér á fiskinum.“

Konan setti færslu um atvikið í Facebook-hópinn Kattarsamfélagið. Segir hún aðspurð ekki hafa áttað sig á að taka mynd þar sem hún og þeir sem með henni voru hafi verið í áfalli vegna atviksins.

Ljóst er að fleiri kannast við manninn þar sem einn skrifar í athugasemd:

„Við lentum í honum fyrr í kvöld og hann sagðist bara vera gefa þeim að borða, keyrðum framhjá og ein konan með honum spurði hvað væri að okkur ss stoppuðum og fórum varlega framhjá.. hver er að henda þessu i fyrsta lagi á miðja götuna!!“

„Það þarf að taka svona viðbjóð úr umferð strax,“ skrifar kona. Og önnur segir: „Myndi fleygja þessu strax, gæti verið löðrandi í frostlegi.“