Haraldur Sigurðsson prófessor emeritus í eldfjallafræði segir að skýringa á þeim mikla sjógangi sem verið hefur á Höfuðborgarsvæðinu, Akranesi og Suðurnesjum undanfarið sé helst að leita í öðru en miklu illviðri. Segir hann að skýringanna sé einkum að leita annars vegar í vaxandi rúmmáli hafsins og hins vegar í sigi jarðskorpunnar.

Eina og vart hefur framhjá lesendum farið hefur orðið mikið tjón á mannvirkjum og innanstoksmunum nærri sjó á Höfuðborgarsvæðinu, Suðurnesjum og Akranesi en á síðasta nefnda staðnum lenti maður í sjónum eftir mikinn öldugang og liggur nú þungt haldinn á gjörgæslu.

Haraldur gerir sjóganginn að umtalsefni í færslu á Facebook:

„Menn kenna roki og illviðri um, en aðal orsökin er fyrst og fremst tengd tveimur þáttum sem hafa valdið hækkun sjávarborðs undanfarnar aldir. Þessir þættir eru (1) vaxandi rúmmál hafsins annars vegar og (2) sig jarðskorpunnar hins vegar.“

Skýringar

Því næst gerir Haraldur nánari grein fyrir þessum tveimur atriðum:

„Sjávarborðsbreytingar hafa verið mældar daglega í Reykjavíkurhöfn síðan 1956 … Í heild hefur sjávarborð í Reykjavík risið um 2.41 mm á ári. Á sama tíma hefur jarðskorpan sem borgin stendur á sigið um 1.2 mm á ári. Þessi tala kemur frá GPS mælingum á lóðréttri hreyfingu jarðskorpunnar frá 1996 til okkar daga. Ágæt heimild um þetta efni er BS ritgerð Haraldar Ketils Guðjónssonar við HÍ 2014.“

Haraldur segir alveg ljóst hver líkleg skýring sé á hækkun sjávarborðsins og sigi jarðskorpunnar:

„Sjávarborðshækkun getur stafað af bráðnun jökla og ekki síður af varmaþenslu sjávar. Hnattræn hlýnun veldur því að hafið hlýnar, þenst út og tekur meira pláss. Sig jarðskorpunnar undir Reykjavík er einn þáttur í flekahreyfingum á Íslandi.“

Hann segir ljóst að, hvað a.m.k. Höfuðborgarsvæðið varðar, sé þessi þróun ekki að fara að breytast:

„Engar líkur eru á að hegðun þessara tveggja þátta breytist á næstunni. Ástand strandlengjunnar úti á Seltjarnarnesi og norðvestur ströndum Reykjavíkur mun því fara stöðugt versnandi.“

Færslu Haraldar, með m.a. skýringarmyndum, má sjá hér fyrir neðan: