Mummi Týr Þórarinsson, hlaðvarpsstjórnandi og oddviti Pírata í Suðurkjördæmi, skaut á samfélagsmiðlum föstum skotum á strákasveitina IceGuys sem hélt stórtóneika um helgina. Fjölmargir komu þeim til varnar í athugasemdum, þar á meðal rokkkóngurinn sjálfur Bubbi Morthens.
„Hvað er dæmið með þetta boy band IceGuys. Fullorðnir menn að taka sexapílið á táningsstelpur….? Corny!“ sagði Mummi í færslu í gær.
IceGuys héldu fimm uppselda tónleika um helgina í Laugardalshöll. Samanlagt seldust 24 þúsund miðar á tónleikana. Aðdáendur eru að stórum, og jafn vel stærstum hluta, af yngri kynslóðinni.
Mummi, sem rak áður Götusmiðjuna og er núna stjórnandi þáttarins Kaldi Potturinn, fékk fjölda athugasemda við færsluna. Og ekki voru allir netverjar honum sammála.
„Nei þetta er saklaus skemmtun fyrir þá saklausu mjög flott,“ sagði tónlistarmaðurinn Bubbi Morthens, sem er augljóslega ánægður með IceGuys.
Aðrir benda á að IceGuys séu góðar fyrirmyndir fyrir ungu kynslóðina. En hljómsveitin samanstendur af bræðrunum Jóni og Friðriki Dór Jónssonum, Herra Hnetusmjöri, Rúriki Gíslasyni og Aroni Can. Auk þess að gera vinsæla tónlist þá hafa þættirnir um hljómsveitina slegið í gegn á Sjónvarpi Símans, en þeir einkennast af léttleika.
„Er þetta ekki bara í góðu lagi. Hef sannarlega séð verri fyrirmyndirnar,“ segir einn í athugasemdum við færslu Mumma. „Æj óþarfi að perravæða alla hluti. Finnst þetta nú bara skemmtilegt þó ég sé sjálf ekki aðdáandi tónlistarinnar,“ segir ein kona.
Margrét Tryggvadóttir, barnabókahöfundur og fyrrverandi þingmaður Borgarahreyfingarinnar, stígur einnig inn í umræðuna og kemur IceGuys til varnar. Það er vegna sjónvarpsþáttanna.
„Frábærlega fyndnir þættir. Besta grínið er sjálfsháð,“ segir Margrét.
