Virgil van Dijk, leikmaður Liverpool, valdi að ganga í raðir liðsins vegna Jurgen Klopp á sínum tíma.

Van Dijk greinir sjálfur frá þessu en hann samdi við Liverpool frá Southampton í byrjun 2018 og hefur síðan þá verið einn allra mikilvægasti leikmaður liðsins.

Önnur lið reyndu að næla í hollenska varnarmanninn en það var Klopp sem gerði gæfumuninn að lokum.

,,Ég gat valið á milli Manchester City og Chelsea,“ sagði Van Dijk.

,,Þegar þú berð saman lið horfirðu á söguna, borgina, liðið og framtíðarplönun en það mikilvægasta er stjórinn.“

,,Jurgen Klopp er mikilvæg ástæða fyrir því að ég valdi Liverpool. Hann er með eitthvað sérstakt. Er það orkan hans? Er það persónuleikinn? Stundum hugsa ég um hvað hann sé með sem aðrir eru ekki með.“

Klopp er sjálfur farinn frá Liverpool í dag en Van Dijk nýtur lífsins undir stjórn Arne Slot sem hefur byrjað mjög vel á Anfield.